БАЙШИНГИЙХАА ДУЛААН АЛДАГДЛЫГ ХЭРХЭН ӨӨРСДӨӨ ХЭМЖИЖ ТОДОРХОЙЛОХ ВЭ?

МУ-ын ЗГ-ын утааг бууруулах ажлын хүрээнд ирэх 5-н сараас эхлэн түүхий нүүрсийг УБ руу оруулахгүй, уурын зуух шинээр барихгүй байх шийдвэр гарлаа. Эхнээс нь уурын зуух барьсан ААН-үүдийг торгоод эхэлсэн. Тиймээс бид ирэх өвөл хэрхэн нүүрс түлэхгүйгээр дулаан өвөлжих вэ гэсэн маш хүндхэн асуудал урган гарч ирлээ. Идэр ес тачигнасан, шөнөдөө -40 градусаас хүйтэрдэг 30-аад хоногт бид илч сайтай Алагтолгой мэт нүүрсээ түлээд давчихдаг байсан бол одоо чадахгүй болох нь ээ. Дулаан алдагдал ихтэй байшингууд цахилгаанаар байшингаа халаахад хангалттай дулаан байж чадахгүй өвөлтэй золгох нь ээ. Тиймээс та энэ өвөл байшингийнхаа дулаан алдагдлыг заавал тодорхойлж, ирэх жил найдвартай дулаалж нүүрсгүй ч гэсэн дулаахан өвөлжихөд тань туслах зорилгоор энэхүү зөвлөгөөг бэлдэн хүргэж байна.

Та байшингаа илүү дулаахан болгоё гэвэл зуухныхаа хүчин чадлыг 2 дахин нэмэгдүүлээд илүү дулаахан болж болно. Цахилгаан тень нэмж асаагаад илүү дулаан байж болно. Гэхдээ бид үнэхээр л утааг багасгая гэвэл байшингаа дулаан алдагдалгүй болгох зайлшгүй хэрэгтэй. Байшин тань дулаан алдагдалгүй болж байж л зарцуулах эрчим хүч багасна, түлэх мод нүүрс багасна, утаа багасна. Байшингаа дулаан алдагдалгүй болгосон бол та халаалтаа юугаар ч шийдэж болно. Дулаан алдагдалгүй бол аль ч халаалт нь зардал бага байх болно шүү. Тиймээс л бид энэхүү зөвлөгөөг бичсэн юм.

Манай компани нь дулаан алдагдлын шинжилгээг хийж эхлээд 4 жил болж байна. Энэ хугацаанд бид нийслэлийн бүхий л дүүргийн ХАУС, орон сууц нийлсэн 50 гаруй айл, албан байгууллагын дулаан алдагдлын шинжилгээг хийж гүйцэтгэсэн. Бид зах зээл дээр байдаг бүх төрлийн дулаалгаар дулаалсан байшингийн дулаан алдагдлыг тодорхойлсон байна. Бид автомат механик агааржуулагчтай, дулаан солилцдог агааржуулагчтай гээд бүхий л төрлийн байшин. Тогоор, нүүрсээр, паартай, шалны халаалттай гэх мэт янз бүрийн халаалттай байшингуудын дулаан алдагдлыг тодорхойлж асуудлуудыг нь шийдэх маш үнэтэй зөвлөгөөнүүдийг өгч заримыг дулаалж өгч бүрэн дулаан алдагдалгүй болгож өгсөн байна. Ингээд энэ их туршлага дээрээсээ үндэслэн дулаан алдагдлаа өөрсдөө илрүүлж болох 2 төрлийн аргыг танилцуулъя.

Агаар нэвтэрч буй хэсгүүдийг тодорхойлох

Эхлээд агаар нэвтэрч, алдагдаж буй хэсгүүдийг цаасан дээр бич. Energy.gov сайтын судалгаагаар байшингийнхаа битүүмжлэлийг сайжруулснаар 5-30%-аар цахилгаан, дулааны зардлаа хэмнэх боломжтой гэж гарсан байдаг. Шууд агаар нэвтэрч байж болох Монголд ихэвчлэн тохиолддог доорх цэгүүд бий.

Цонх, хаалганы жийргүүд болон цонхыг суулгах үеийн технологийн алдаа

Та лаа эсвэл хүж асааж цонх хаалганыхаа эргэн тойрноор барьж шууд үлээж хүйтэн агаар нэвтэрч байгаа эсэхийг шалгаж болно. Мөн нимгэн цаас, гялгар уут барьж үзсэн ч болно. Цонх, хаалга далий муруй суулгах, шахдаг хөөсийг дутуу бага шахсанаас шалтгаалж цонхны жийрэг эсвэл завсраар сийгэх нь элбэг тохиолддог. Та гэхдээ шалгаж байх явцдаа шатамхай материалын хажуугаар лаагаа барихдаа гал алдах эрсдлийг заавал бодолцож болгоомжтой байхыг сануулъя!

Хаалганы амлагаагаар сийгэж буй дулааны зураг

Цонх, хаалга далий муруй суулгах, шахдаг хөөсийг дутуу бага шахсанаас шалтгаалж цонхны жийрэг эсвэл завсраар сийгэх нь элбэг тохиолддог

Цонхны амлагааны дулааны зураг

Цонхны тавцанг буруу суулгаснаас болж их дулаан алдагдалтай, цан цохиж байсныг илрүүлэн янзалсны дараахтай харьцуулсан зураг

Шал хананы уулзвар, дээвэр, хананы уулзварууд

Туршлагагүй барилгачдын гаргадаг том алдаануудын нэг энэ. Дулаалгууд хоорондоо уулзаж байгаа хэсгийг сайн нийлүүлдэггүй. Энэ нь эргээд байшингийн булангуудаар агаар нэвтэрч шууд цан цохиж обой хууларч, паркет норж пэмбийх, дотоод заслыг эвдэлж мэдэгдэнэ. Үүнээс болж ахиад л нэмэлт зардлууд гарч эхэлдэг. Цаашлаад хөгц, мөөгөнцөр ургаж байшингийн хийцлэлийг гэмтээн, эрүүл мэндийг хохироож эхэлдэг.

Дээвэр хананы уулзварын дулаан алдагдлын зураг

Нүдээр харахад мэдэгдэхгүй ч дулаалга дутуу хийгдсэн хэсгүүд нь маш их дулаан алдагдуулж байдаг.

Дээвэр хананы уулзварын дулаан алдагдлын зураг

Нүдээр харахад мэдэгдэхгүй ч дулаалга дутуу хийгдсэн хэсгүүд нь маш их дулаан алдагдуулж байдаг.

Сангийн хоолой, бохирын хоолой, цахилгааны утаснууд гадагшаа гарч буй хэсгүүдийг шалгах

Шууд гадагш гарч буй бүхий л төрлийн барилгын хэсгүүд маш сайн дулаалгатай, ямар ч нүх сүвгүй байх нь чухал байдаг. Зүүний чинээ нүхээр тэмээн чинээ жавар гэж эртний үг байдаг. Таны байшин хэр сайн дулаалгатай байхаас үл шалтгаалан аливаа хүйтэн агаар нэвтэрч байгаа хэсгүүд нь таны дулааны мөнгийг шууд гадагш нь цацаж байдаг.

Дулаалаагүй хоолойн гадагш гарсан зураг

Дулаалаагүй хоолой нь шууд таны гэрийн дулаан алдагдал болдог

Яндан, зуух, камениар хүйтэн агаар шууд нэвтрэх

Ер нь шууд гадаатай харьцаж байдаг бүхий л зүйлсэд дулаалгын болон битүүмжлэл сайтай байх стандарт байдаг. Ялангуяа яндан камен зуух гаднаас шууд агаар орж ирэхийг хамгаалсан хавхлаг суурилагдсан байх шаардлагатай. Та камен, зуух руугаа гараа хийхэд л шууд агаар орж ирж байгаа эсэхийг мэдэх боломжтой.

Хавхлаггүй яндантай камений дулаан алдагдлын зураг

Агааржуулалтын системийг шалгах

Монголчуудын хувьд нийтлэг гаргадаг том алдаа нь бохир агаар гаргах, цэвэр агаар оруулах агааржуулалтын системийг огт хийдэггүй эсвэл буруу хийгээд байдаг. Бохир агаар гаргах ганц хоолой хийдэг ч цэвэр агаар оруулах систем хийдэггүй. Эсвэл агаар сорох системийн хоолой бүдүүн нарийн байж агаарын даралтаар соруулах системийг өөрсдийн дураар буруу хийдэг. Энэ нь эргээд бохир агаарыг гадагш биш өрөө хооронд нь зөөх буруу систем болж хувирдаг. Гал тогооноос унтлагын өрөө рүү үлээх гэх мэт. Энэ нь эргээд эрүүл мэндэд хортой, дулаан алдагдалтай байх нөхцөл болж хувирдаг. Гэхдээ энэ нь огт агааржуулалтын систем хийх хэрэггүй гэсэн үг огтхон ч биш!

Халаалтын систем жигд бус ажиллаж байгааг илрүүлсэн зураг

Дулаалгаа шалгах

Та ердөө термометр ашиглаад л дулаан алдагдлаа их эсвэл бага байгааг илрүүлэх боломжтой. Лазер термометр эсвэл өрөөний жижиг термометр хэдэн ширхэг байхад л болно.Та термометрүүдээ шал, хана, тааз, цонх, хаалга, өрөөний голд гээд боломжтой газрууддаа байрлуулах хэрэгтэй.Тухайн термометрүүдээ цаг тутам температурууд нь хэд байгааг бичиж тэмдэглэж авах хэрэгтэй.Тэмдэглэж авсан температуруудынхаа дунджийг гаргаад, өрөөний голд байгаа термометрээс бусад термометрүүдийн градус хэдээр зөрүүтэй байгааг харна.

Дулаан алдагдалгүй байшин бол өрөөний хаана ч ижил температуртай байх ёстой гэсэн үндсэн зарчмаар дулаан алдагдлаа тодорхойлж байна гэсэн үг.

Манай компанийн инженер техникийн ажилчдын зохион бүтээсэн “Хар хайрцаг” төхөөрөмж нь таны байшингийн бүхий л цэгүүд дээрх температурыг 24-н цагийн турш тэмдэглэн авч, температурын мэдээллийг интернетээр хүлээн авч хардаг учир дулаан алдагдлыг маш нарийн тодорхойлдог.

“Хар хайрцаг” дээрх температурын бичлэг

Температурын бичлэг нь яг л байшингийн зүрхний цохилт шиг, доголдолтой цэгүүдийг нарийвчлан тодорхойлдог.

Температуруудын зөрүү их байх тусам тухайн хэсгийн дулаан алдагдал их байна гэсэн үг. Жишээ нь дээврийн (таазны) температур өрөөний температураас 4 градусаар бага, хананы температур өрөөний температураас 2 градусаар бага байгаа бол дээврээр илүү их дулаан алдагдаж байна аа гэсэн үг юм.

Суурийн дулаан алдагдлыг илрүүлсэн зураг

Суурийн дулаан алдагдлыг гаднаас нь болон дотроос нь тодорхойлж, хэрхэн дулаалах шийдлийг зөв гаргаж өгдөг

Дээврийн дулаан алдагдлыг илрүүлсэн зураг

Дээврийн дулаан алдагдлыг маш нарийн тодорхойлж байж зөв дулаалах боломжтой болдог.

Ингээд та маш энгийн аргаар дулаан алдагдлаа шалгах боломжтой боллоо. Харин таньд дээрх дулаан алдагдлуудаа найдвартай дулаалах ажил л үлдлээ. Манай компанийн хувьд дулаан мэдрэгч камераар таны байшингийн бүхий л хэсгийг нэг бүрчлэн зураг дарж мэргэжлийн программийн тусламжтайгаар дулаан алдагдлыг тань 100% тодорхойлж, яг аль хэсгээр хэдэн хувийн дулаан алдагдаж байгааг “Хар хайрцаг” төхөөрөмжөөрөө маш нарийн гаргадаг. Мөн түүнчлэн 15 жил ХАУС барьсан арвин их туршлагаасаа таньд хэрхэн зөв, бүрэн дулаалах зөвлөгөөг өгдөг юм аа.

Та дулаан алдагдлаа бүрэн тодорхойлохгүйгээр таамгаараа байшингаа дулаалбал цаг хугацаа, мөнгөө дэмий үрнэ. Тиймээс эд хүйтэрч байгаа энэ үед л байшингийнхаа дулаан алдагдлыг үнэн зөв, бүрэн тодорхойлж авах нь хамгийн чухал юм шүү.

Та бүхэнд энэхүү зөвлөгөө маань хэрэг болж дулаан алдагдалгүй байшинд өнтэй өвөлжих болтугай гэж хүсье. Асуух зүйл байвал доор сэтгэгдэл дээр бичээрэй. Мөн манай Facebook мессенжерээр холбогдоорой.